Mánudagur

Gærdagurinn var kósýdagur líka :) Ég svaf alveg til 11:00!!! :) Fór út og verslaði í matinn og náði í litlu 10 ára systur mína :) Já ég 35 ára gamla konan á 10 ára systir! :) 

Fór heim með matinn og skar niður grænmeti í kjötsúpu og svo skelltum við okkur í Keilu :) Ég, sonurinn og litla systir :) Ég ætlaði nú bara að taka hálftíma leik því seinast þegar við fórum í keilu þá var sonurinn alveg búinn á því (og ég líka) eftir hálftíma leik og seinni hálftíminn var bara martröð :P Við hvorug í neinu formi :P Er svona ár síðan við fórum í Keilu minnir mig :) 

Eftir allt ruslfæðið sem sonur minn var á (og ég) þá var hann mjög lár í járni og D vítamíni. Fyrir hjúkrunarfræðinginn mig var þetta alveg þvílík skömm!! Að ég hjúkkan sem átti að vita betur átti vanrækt barn!! Shitt!! 

Alveg ferlegt að hafa ekki fattað merkin! Taldi stráksan minn bara vera svona þunglyndan! En hann hafði ekki orku í að gera eitt né neitt og vildi bara liggja í rúminu. Eigum við að ræða eitthvað hvernig mætingin var í skólanum??? 

Svo fékk hann sár á fótinn og ég fór með hann á læknavaktina! og læknirinn bara spurði strákinn hvort hann væri á lífi!! Þá var hann orðinn svo hvítur! Og þá kom í ljós mikill skortur á Járni og D vítamíni!

Til að kóróna skömmina mína sem hjúkrunarfræðingur, þá var ég akkúrat að vinna með lækninum sem hitti hann á Læknavaktinni! 

En það er ótrúlegt að þó maður sé hámenntaður hjúkrunarfræðingur þá sér maður ekki hvað er beint fyrir framan sig!

En sonurinn var settur á járn og D vítamín kúr og samhliða því breytti ég áherslum í mataræðinu og fór að elda fisk og meiri fisk!!! og smám saman þá fór stráksi að hressast og mætingareinkunnin fór úr 1 og upp í 10! Var 1 í vor og var með 10 núna fyrir haustönnina :) Einkunnirnar almennt lagast og allur að breytast til betri vegar :)

Í keilunni í gær var hann (og ég) með fulla orku í klukkutíma leik :) Ofsalega gaman að sjá mun á barninu svona til betri vegar :) Er komin með lit í kinnar og bara flottur :) 

En það er ekki dans á rósum að fara að elda fiskmeti þegar barnið er alið upp á skyndibita!! En þetta er allt að koma!!

Já svo ég haldi áfram með gærdaginn! Þá komum við heim og elduðum kjötsúpu. Hún var svooo góð :) Svo setti ég helling af súpu í frysti svo þegar tíminn er naumur þá er hægt að taka súpu úr frystirnum :) Mjög þægilegt fyrir önnum kafna einstæða móðir úr Breiðholti :) 

Svo horfði ég á þáttinn ,,Fangar" þegar allt var komið í ró og búið að ganga frá eftir veislumatinn :P Ofsalega eru þetta flottir og vel gerðir þættir. Maður er bara kominn í kvíða í byrjun yfir að þátturinn muni taka enda tæpum klukkutíma síðar :P Svo spennó :) 

Svo var bara farið í háttinn snemma svo marr yrði funkerandi í vinnu í dag :) 

Hélt ég myndi ekki hafa það af að fara frammúr í morgunn! Var með harðsperrur frá helvíti eftir keiluna!! Kunni samt ekki við að fara að tilkynna veikindi vegna harðsperra svo ég varð bara að bíta á jaxlinn :) Enda alger jaxl þegar kemur að harka af sér verki :P En dagurinn var nú ekkert auðveldur, var að drepast úr ,,mínum föstu" verkjum í fótunum auk þess að vera með harðsperrur!

Svo ég skreið eiginlega heim úr vinnunni og henti kartöflum í pott og eldaði fljótlega reykta ýsu :) Sonurinn borðaði hana með bestu lyst! Er farinn að læra að það þýðir ekki að mótmæla mömmu sinni :P En hann viðurkenndi að honum findist þessi fiskur (reykta ýsan) mjög góður fiskur :) og mér fannst ég hafa unnið stórsigur :D :D 

Ætla sko ekki að hreyfa mig meira í kvöld!!! Engir stigar eða neitt! heill vinnudagur í að bíta á jaxlinn dugar í dag :P Ætlum bara að horfa á þátt af Gotham og fara svo snemma að sofa :) 

Xoxo :) 


Laugardagur til leti

Gærdagurinn var algerlega ,,laugardagur til leti" dagurinn :) Ég svaf til rúmlega 10 og eftir að hafa skoðað alla fréttamiðla vel og vandlega þá skipti ég á rúmunum og skúraði heimilið :P Ætlaði sko að gera þetta allt á föstudeginum en öklinn á mér tók upp á því að festast svo ég var ekki alveg skúringarhæf þá :P Svo leyfði ég þvottavélinni að rúlla tvo hringi á meðan ég þvoði óhreinu rúmfötin :P 

Þar sem ég er frekar svifasein í þrifunum og þarf að taka endalausar pásur þá tók þetta tímann sinn en þar sem ég var bara heima þá var það allt í lagi. Þegar maður er viðkvæmur í skrokknum þá eru skúringar og rúmfataskipti ekki skemmtilegasti hluturinn :P Er eiginlega bara í kvíðakasti fyrir þessu tvennu alltaf svo það var æðislegt þegar þessu var lokið :)

Fórum svo bara í mat til mömmu í gærkvöldi. Hún var með alveg oooofsalega góðan hamborgarhrygg :P 

Svo þegar við komum heim þá höfðum við aftur kósý time :) Kveiktum á kertum og slökktum ljósin og horfðum á einn þátt af South Park og 3 þætti af Gotham seríunni. Það sem strákurinn þurfti að hafa fyrir því að fá mig til að samþykkja einn þátt af Gotham! En svo enduðum við á þremur þáttum því þetta voru bara ofsalega góðir þættir :) 

Var þó engin sykur með í för yfir sjónvarpinu þetta kvöldið eins og kvöldið hið fyrra :P 

Allt í einu var kl. að verða eitt og ég uppgötvaði að ég var ennþá vakandi!! Það gerist ekki oft að ég sé enn vakandi á svona ókristilegum tímum :P En ég skreið svo í rúmið og var sofnuð 5 mín seinna :P

Var ofsalega notó að vakna í morgunn í hreinu rúmi og í hreinni íbúð :) En jæja nú ætla ég að fara að taka daginn í öreindir :P

Síjú :) 


Kósý föstudagur :)

Kósý föstudegi að ljúka :)

Var í vaktafríi í dag svo ég svaf alveg til 9 í morgunn :D Var svo að dúllast hérna heima, aðallega að skoða fréttamiðla og hvernig gengur að upplýsa mál ungu stelpunnar sem verið er að leita að. Vona að hún fari að finnast! 

En ég skellti mér í ræktina í hádeginu, í World Class á nesinu. Átti leið niður í bæ svo sá staður varð fyrir valinu :) Annars eigum við Breiðhyltingar mjög fína líkamsræktarstöð, sem er hluti af WC keðjunni :) Mjög flottur staður og notalegt að koma á :) Nesið er líka mjög sterkt inn hjá mér svo ég fer oft þangað. Flott að vera með marga staði og geta svissað á milli :) En ég fór einu sinni í Laugardalinn og það geri ég ALDREI aftur!! Fannst vera of mikið þar af litlum stífmáluðum smástelpum með tútturnar í allar áttir! og ég stakk bara í stúf og minnimáttarkenndin blossaði upp!! ALDREI AFTUR!! 

Skil aldrei pointið með að mála sig ÁÐUR en maður fer í ræktina! En ég yrði eins og klessuverk ef ég málaði mig áður en ég færi á stað þar sem ég svitnaði eins og enginn sé morgundagurinn :P 

Eftir að hafa svitnað vel eftir klukkutíma púl þá fór ég í notalega sturtu og þvoði mér hátt og lágt og þegar ég var að þurrka á mér hárið þá fann ég furðulega lykt og smám saman rann það upp fyrir mér að kötturinn hafði PISSAÐ á handklæðið!!! Dí hvað það var óþægilegt! Vera rennandi blaut eftir sturtuna og vera með kattahland í handklæðinu :/ Nú voru góð ráð dýr! Svo ég skellti mér í gufuna og var þar heillengi og lét mig þorna þar og hugsaði kettinum þegjandi þörfina! En hann er svo mikið krútt að honum var fljótlega fyrirgefið :) Svona krúttum fyrirgefst allt! Má segja að þetta hafi verið mér að kenna :/ Ég var að þrífa kattasandinn í dag og krúttið hefur þurft að pissa og kattakassinn í baðkarinu fullur af sápuvatni :( When you have to go, you have to go!!! Kötturinn kann allavega að bjarga sér! :) 

Í kvöld kenndi ég svo syninum að elda kjúklingabita :) og ofnbakaðar franskar með :) Maður þarf víst að skila þessum börnum út í lífið sjálfbjarga :D Ég eldaði mér nokkrar gellur, svo það var tvíréttað hjá okkur í kvöld :) Ég er mjög hrifin af gellum því ég er að reyna að breytast í það sem ég borða :P En að koma fisk ofan í barnið! Það er pinting fannst honum, svo ég gat ekki lagt þetta á hann á föstudagskvöldi :P

Svo kveiktum við á kertum og slökktum ljósin og horfðum á mynd :D Suicide squad held ég að hún heiti :) En ein gömul leikkona úr nágrönnum leikur eitt aðalhlutverkið. Margot Robbie heitir hún og er alveg súperflott stelpa og orðin ein skærasta Holliwood stjarnan :P Ég hinsvegar á eftir að sjá þátt dagsins af Nágrönnum :) Heppin ég :) :) Horfi pottþétt um helgina :P 

Við mæðginin ,,misstum" okkur aðeins í sykuráti yfir myndinni svo ég þakkaði Guði fyrir að hafa þó dröllast í ræktina í dag :P Það var sko ís og súkkulaði og gos!! En marr má nú af og til verða ,,high" af sykri :P Vona bara að ég nái mér niður og nái að festa svefn hahahah :) :) :) 

Þangað til síðar :) :) :) Bæjós :) 


Pizzastúss

Ég var í vaktafríi í dag og stráksinn minn lasinn heima. Svo ég svaf alveg til tíu í morgunn :) Mjög nice :) Stráksinn svaf til 16!!! En þegar maður er slappur þá leyfist manni það :P

Ég fór svo í ræktina um hádegisbilið og horfði á Neighbours á meðan ég hitaði upp á hjólinu :) Svo tíminn leið mjög hratt, elska nágranna :) Er búin að vinna mig upp og horfa á alla þætti sem ég átti eftir að horfa á :) Tók heilt kvöld og heilan morgunn þegar ég var í fríi :) 

Þvílíkur lúxus að geta horft á uppáhaldsjónvarpsþáttin sinn á meðan maður hamast á hjólinu :P Á svo erfitt með að hjóla vegna verkjastúss svo það leiðir hugan aðeins frá verkjunum :P Hætti mér ekki fyrir mitt litla líf á göngubretti, því þá þyrfti ég að skríða heim aftur :P Yrði mjög vandræðlegt :P 

Í kvöldmatinn elduðum við sonurinn bestu pizzu sem við höfum á æfinni fengið :) Aldrei smakkað jafn góðan botn! Gerður úr möndlumjöli. Fékk uppskrift úr LDL bók sem ég fékk í jólagjöf og sé ekki eftir að hafa prófað hana. Gerði hana fyrst um helgina og bauð fólki í mat, gerði tvær pizzur og þær voru ekki lengi að klárast :) Önnur var með humri á og hin með kjúkling :) Gerði kjúklingapizzuna núna aftur að beiðni sonarins :) En mér fannst humarpizzan samt betri :)

Í kvöld var ég með sem álegg: sveppi, papríku, rauðlauk, kjúkling, ristaðar furuhnetur, fetaost og venjulegan ost. Kryddað með chillikryddi, paprikukryddi og oregano :) Þar sem þetta er mjög matarmikil pizza þá dugðu okkur sitthvor sneiðin og nágrannakona fékk eina sneið svo það er rúmlega hálf pizza eftir :) Verður hituð upp á morgunn og þá slepp ég við að elda :) 

Mér hefur aldrei tekist að gera ,,heilsubotn" en þessi er mun betri en venjulegur hveitibotn. Og það sem besta er að syninum fannst hann góður :) Nuna ætla ég að horfa á plastbarkamálið með öðru og fylgjast með fréttamiðlum á hinu. Er alltaf að vona að unga konan sem er verið að leita að finnist!! 

Með pizzakveðju, Steinunn :) 

16130102_10211692433296873_775617685_o


Mánudagur til mæðu

Jæja þá er það mánudagur til mæðu :) Vaknaði kl. 6:00 í morgunn! Hversu dásamlegt er það þegar maður getur alveg sofið til 07:00??? Verð að líta á björtu hliðarnar, ég hafði þá tíma til að græja smúþí fyrir okkur soninn :P Hann fékk jarðarberja, en ég fékk hnetu :P *****slef****

Eftir vinnu í dag lá leið mín í fiskbúð Hólmgeirs í Mjóddinni :) Er að experimenta með fiskinn og það virðast vera endalausar fiskitegundir sem ég hef aldrei smakkað!! Keypti Sólkola sem ég hef aldrei séð í fiskiborðinu en hafði heyrt vel af :) Og nokkrar gellur (maður er það sem maður borðar!) :)

Sonurinn ætlaði að fara á KFC með vini sínum svo ég gat með góðri samvisku eldað mér dásamlega fiskimáltíð :) Sólkolinn var æðislegur :) Steikti hann á pönnu upp úr smjöri og kryddaði með salti og pipar og sauð nokkrar gellur með:) Borðaði með smjöri og kartöflusalati og held ég hafi augnablik farið til himna af þessari dásemd :D 

Syninum finnst þetta mataræði alveg skelfilegt... Honum finnst það íll meðferð á barni að hafa fisk í matinn :P En hann fékk barbíkjú zinger twister máltíð í kvöld. Svo við fórum bæði til himna, hvort á okkar hátt :P

Svo var ég löt og nennti ekki í ræktina, var að drepast í fótunum! Svo ég notaði það sem fæti var næst :P Eða stigaganginn :) Hljóp nokkrar ferðir upp og niður, ákvað að leggja á mig nokkrar mínútur af sársauka og fann svo myndband á jútúp þar sem ég gat setið á stól og gert æfingar til að þjálfa ,,byssurnar" :) Síðan þá búin að liggja með fæturnar upp í loft og spjalla við gesti sem komu í heimsókn :)

Núna er það bara rúmið eftir langan dag :P 


Skellur hvellur :)

Já sæll!! Ætlaði ég að blogga?? 

Þessar húsmæður í Breiðholti geta verið svo önnum kafnar! Er búin að vinna aðeins meira en ég ætlaði upp á síðkastið svo lítið hefur verið um að hanga í tölvunni :D

Um helgina ætlaði ég að fara á útsölur og dressa soninn aðeins upp en við enduðum bara á því að fara á kaffihús og í Hagkaup að kaupa spilið ,,Skellur" sem Auddi, GillZ og Steindi eru höfundar af (ásamt einhverjum fleirum). Varð ekki tími til að spila það um helgina svo þegar ég kom heim í dag þá beið mín tilbúið leikborð og 14 ára drengur sem vildi spila. 

Þar sem ég er engin sérstakur aðdáandi karlmanna á fertugsaldri sem hegða sér eins og smástrákar var það ekki mjög auðvelt að láta undan og kaupa spilið en ég gerði það fyrir drenginn, sem langaði ofsalega til að spila þetta. Enda gallharður aðdáandi þríeykisins. 

Var ekkert voðalega hrifin þegar upp komu orð eins og ,,leðurhommi" ,,smokkur" ,,Sleypiefni"  og fleira. Að reyna að útskýra t.d. orðið ,,sleypiefni" er ekki það skemmtilegasta sem ég hef gert með 14 ára syni mínum! En ég vissi s.s. að hverju ég gékk þegar ég keypti spilið! En drengurinn skemmti sér vel og þá er takmarkinu náð! :)

Núna er ég ein heima og stráksi í bíó, þyrfti að taka smá ,,Nágranna" maraþon en ég hef ekki séð þættina síðan fyrir jól. Veit ekki hvort Piper Willis megi vera með Tyler Brennan en þau eru mjög hrifin af hvort öðru en aldursmunurinn á þeim er mikill því hún er bara 16 ára og hann kominn yfir tvítugt. Hálfsystir hennar er ástfanginn af kaþólskum prest og þráir ekkert heitar en að hann taki hana frammyfir Guð. 

Einn uppáhalds karakterinn minn í þáttunum er Paul Robinsson sem er alltaf að lenda í einhverju veseni. En síðast þegar ég horfði þá var hann tiltölulega laus úr fangelsi. Hafði verið ranglega sakfelldur fyrir að sprengja upp Lassister hótelið. Hann var að hefna sín á öllum sem trúðu því ekki að hann væri saklaus. Finnst Paul æðislegur! Alltaf að gera eitthvað af sér en maður hefur samt alltaf samúð með honum. Er búinn að vera í seríunni að mestu frá upphafi svo hann á eflaust fleiri aðdáendur en mig :D

En ég hef bara ekki meiri orku! Að vinna allan daginn og koma svo heim að spila ,,Skell" við 14 ára son minn. Það er bara ekki leggjandi meira á einstæða móður í Breiðholti :D Það verður bara snögg sturta og svo undir sæng :P 

Bæjós :) 

 

 


Þriðji bloggdagur! :)

Þá er þriðji dagur ársins kominn nær enda :) Eða að enda kominn fyrir þreyttar kellur í Breiðholti :) Leið eins og það hefði ekið yfir mig trukkur þegar ég rankaði við mér í morgunn. Ofsalega er erfitt að koma sér af stað í hreyfingu eftir jólasukkið :P Var ekkert nema harðsperrur!! Lá til 7:10 uppi í rúmi og enginn smá flýtir að koma sér í vinnuna en það hafðist að vera kominn í vinnuna rétt fyrir klukkan átta :) 

Var með þvílíka kvíðahnútinn í maganum í ALLAN DAG yfir tilhugsuninni um að reyna að koma reyktri ýsu ofan strákinn minn!!! Var líka með samviskubit yfir hversu lítinn tíma ég gaf stráknum í gær. Sá fyrir mér að ég kæmi heim seint um og síðir ef ég færi í ræktina eftir vinnu, svo ég ákvað að í staðinn fyrir ræktina að stunda HEIMALEIKFIMI!!! Nú koma öruglega einhverjar perrahugsanir upp hjá fólki :P En ég ákvað að nýta stigana heima hjá mér og hljóp x3 upp og niður 7 hæða blokkina sem ég bý í:) Og þegar ég var orðin vel móð og másandi þá fann ég líkamsræktarmyndbönd á youtube og fór að gera æfingar. Hef aldrei notað youtúp í líkamsræktartilgangi en ég held að ég hafi reynt meira á mig en ef ég hefði verið 3 tíma í ræktinni!! 

Er búin að tína linkinum á fyrra æfingarmyndbandið en það var alhliða æfingar, maga og alles :P En það seinna var æfingar til að losna við fitu af upphandleggjum (sem ég er með plenty af!!) Þetta myndband https://www.youtube.com/watch?v=hAGfBjvIRFI :) 

Þegar ég var í mjög vandræðalegri stellingu heyrði ég að herbergishurð sonarins var opnuð og var alveg ,,shit, hvað heldur barnið eiginlega????" Og mér til mikils léttis þá var bara kallað ,,mamma þú mátt ekki trufla mig" :) En þá var hann að spjalla við bekkjarfélaga sinn á netinu og mamma hans mátti ekki opna hurðina og gera hann vandræðalegann :P Held að stráksi hefði dáið hefði hann labbað með tölvuna fram og bekkjarfélaginn hefði séð mömmu hans!!! OMG!! Hann hefði öruglega ekki farið framar í skólann!!! Maður skammast sín svo fyrir foreldra sína þegar maður er fjórtán, tala nú ekki um það ef foreldrarnir myndu sjást í beinni, móðir og másandi með rassinn upp í loftið og alla útlimi í sitthvora áttina :P 

Á meðan ég gerði þessa æfingar mallaði reykta ýsan í pottinum ásamt kartöflum :P Svo ég sló tvær flugur í einu höggi og var búin að rækta mig og elda kvöldmatinn klukkutíma eftir að ég kom heim úr vinnunni :)

Sonur minn 14 ára varð auðvitað að halda kúlinu og segja að maturinn væri vondur því þetta var fiskur en ég hef aldrei nokkurn tímann sé fisk hverfa jafn fljótt af diski :) Svo ég sá að þetta féll í kramið :) Enda var þetta alveg ofsalega gott :) Verður klárlega reykt ýsa oftar :) Ekki skemmdi fyrir að þetta var máltíð sem kostaði rúmlega 800 krónur :) 

Um sex leytið var ég búin að öllum skyldum, vinna, elda, líkamsrækt, ganga frá eftir matinn, henda í þvottavél :) Tilbúin í kvolítí tæm með stráknum :) En þá var hann búinn að plana hitting á skype við bekkjarfélaga sinn svo ég ég sit bara einmana hérna og hef ekkert annað að gera en að babla við sjálfa mig hérna á netinu! 

Ég verð að fara að draga barnið úr þessum tölvuhitting! Mér leiðist!!! Bæjóssssssssssss :) 


Annar dagur ársins :)

Þá er annar dagurinn að verða búinn á nýju ári. Vaknaði klukkan sjö (í morgun) og skellti mér í vinnuna :) Eftir skemmtilegan vinnudag kom og ég heim og hitaði upp áramótasteikina fyrir soninn sem beið glorsoltinn heima í jólafríi :) Fór svo í ræktina og í Krónuna og verslaði aðeins í matinn. Svo kom ég heim og tók til eftir matinn og hélt áfram að matbúa fyrir soninn! Það sem 14 ára drengir geta borðað!! Þegar ég var búin að stússast í heimilisverkum þá var klukkan orðin 21:20 og ég ætlaði að gera svoooo mikið þegar ég væri búin að vinna, en finnst ég ekki hafa orðið neitt úr verki! Ætlaði að eiga eitthvað kvolítí tæm með drengnum mínum en eina kvolítítæmið var þegar ég bjó til djúsí samloku handa honum áðan! 

Guð hvað mig langaði í þessa samloku! Með Camenbert smurosti, skinku og osti ásamt hvítlauks og papríku kryddi!!! MMMmmmmm *slef* En ég verð að hemja mig! Svo ég stóðst freistinguna en djö... var það erfitt!!! Er búin að standa mig bara þokkalega vel í dæetinu í dag, stal ekki nema tveimur konfektmolum í vinnunni!! 

En ég er með samviskubit, ekki gert neitt með drengnum mínum í dag! Fyrir utan samlokugerðina! Talvan hefur alveg sinnt sínum ,,skyldum"... Getur verið að svona samviskubit finnist hjá mæðrum í öðrum hverfum? Getur verið að einhvers staðar finnist móðir annars staðar sem sé með gapandi samviskubit yfir að hafa látið barnið sitt ganga sjálfala allan daginn??? Móðir sem býr ekki í Breiðholti???

Ég skal gera eitthvað á morgunn með gullmolanum!! 

Litli knúsulingurinn á reyndar ekki eftir að eiga glaðan dag á morgunn! Það verður nefnilega reykt ýsa í kvöldmatinn! Hann veit það ekki ennþá og ég mun ekki segja honum það fyrr en þar að kemur. Það verður hrikalegt að vita af þriðjudagstilboði á Dómínós og neyðast til að borða *hrollur* fisk! Og það reyktan!! 

,,Greyið" barnið á móður sem er að taka til í mataræðinu og experimenta með alls konar fisk og hann er sko ekki sáttur við þetta!! Mamman er með samviskubit yfir að hafa ekki alið hann upp við gæðagóður frá fyrsta degi, því það er erfitt að snúa við mataræðinu þegar maður er 14 ára og alin upp á skyndibitafóðri!

Afsakið stafsetningavillur og innsláttarvillur! Er kominn háttatími :P

Gúdnæt :) 


Fyrsta blog ever :)

Hæhæ og gleðilegt nýtt ár allir :)

Ég ákvað að prófa þetta blog og leyfa fólki að fá innsýn í það hvernig lífi við einstæðu mæðurnar í Breiðholti lifum. Erum við ólíkar einstæðu móðurinni í Vesturbænum? Erum við bara keðjureykjandi bótaþegar með hóp af börnum sem við sinnum ekki?? Miðað við umfjöllunina sem við fáum í fjölmiðlum þá er ekkert sem er verra en að vera einstæð móðir í Breiðholti. Svo ég ákvað að skella bara í eitt blogg svo fólk fái það beint í æð, hvernig dæmigerð einstæð móðir er í Breiðholtinu :)

Mál málanna, áramótaskaupið!! Það var hægt að hlæja aðeins að því og fyndnast fannst mér kúkaatriði brúðkaupshjónanna í Sandgerði :) Hefði öruglega ekki kveikt á perunni varðandi það aðtriði nema vegna þess að ég keypti sjálf veitingar af Texasborgara Magga í fermingu sonar míns í mars og miðað við ,,gúmmelaðið" sem ég bauð upp á þá finnst mér kraftaverk að gestirnir fóru ekki frá mér með upp- og niðurgang. En maður lærist víst af mistökunum og að afla sér upplýsinga og fá alvöru meðmæli næst þegar maður þarf á veisluþjónustu að halda :)

Fannst líka atriðið flott með brúnegginn sem komu beint frá Bónda. Ég er svo einföld að kúk og piss brandarar duga svo ég fari að hlæja en um leið og húmorinn verður eitthvað dýpri þá minnkar skilningur minn :P

Óholla jóla lífernið var svo toppað á Gamlárs og núna verður aftur haldið áfram á vegferð til heilbrigðis :) Helmingurinn af aukakílóunum lét sig hverfa árið 2016 og núna verður haldið áfram í næsta lið og stefnan er að verða drop dead gordjöss jólin 2017 :) Það munaði helling að losna við þessi aukakíló og síðustu mánuði hef ég alveg fengið frið fyrir öllu þessu Herbalife sölufólki sem vilja bjóða mér í ,,lífstílsmat" og pranga inn á mig einhverju dufti og ég á víst að verða alveg eins og tálgaður tannstöngull á nokkrum mánuðum. En mér finnst bara alltof gott að borða að ég get ekki hugsað mér að lifa á einhverju dufti sem bragðast eins og pappír eða eitthvað álíka. Svo kostar þetta líka bara svimandi upphæðir og ég eins og áður segjir, einstæð móðir í Breiðholti!! Shitt sko! Glætan að ég hafi efni á því að borga risa upphæðir fyrir duft :P

Ég vil frekar eyða þessum peningum í MAT!!! MATUR er betri en DUFT!! En það sem maður hefur látið plata sig út í, í gegnum árin. Alls konar mambó jambó aðferðir sem eiga að bæta gæði lífs míns og blebleble..... En eins og ég skrifaði áður þá lærir maður víst af mistökum sínum :P Með öllum þessum aukakílóum græddi ég álagsmeiðsl í fætur og þegar maður er með verki þá er maður mjög auðvelt skotmark fyrir allskonar fólk sem er að selja alls konar mambó jambó meðferðir. Ég t.d. lét plata mig til að kaupa meðferð með GASLOGA!! JÁ GASLOGA!! Ég borgaði 1000 krónur fyrir hverja mínútu sem einhver gaur lét gasloga loga eins nálægt húðinni á mér og rembdist eins og rjúpan við staurinn að gefa ekki upp sársaukastununurnar þegar verið var að kveikja í húðinni á mér!! Sem betur fer þá var ég ekki með varanlegan skaða eftir þessa meðferð :P Eina sem ég ,,græddi" var að borga 4 þús fyrir skiptið og ég fór ekki bara einu sinni! Mig minnir að ég hafi farið í 3 skipti!!

Annað sem ég gerði var að kaupa mér ,,regndropameðferð" eða hvað sem það kallaðist. Hjá hómópata. Það sem hómópatinn gerði var að láta ilmolíu ,,rigna eins og regndropa" á bakið á mér og nuddaði þeim svo inn og það átti að laga vandamálið sem ég var með í hælunum!! Þrátt fyrir að hafa logsviðið í bakið af þessum olíum þá fór ég AFTUR! AFTUR!!!!! Borgaði um 20 þúsund en sat uppi jafn verkjuð á áður!

Ég er búin að gera ýmislegt meira með tilheyrandi fjárútlátum (meira að segja Herbalife) og ALDREI aftur!! Búin að kaupa allskonar óhefbundnar remedíur og drasl sem virkar ekki neitt!! Skammast mín alveg ferlega yfir að vera hámenntaður hjúkrunarfræðingur og láta pranga öllu þessu drasli inn á mig, þegar maður á engan veginn peninga fyrir þessu drasli :P

En ég ætla að leyfa ykkur að fylgjast með hvernig einstæð móðir í Breiðholtinu fer að því að bæta heilsuna án þess að láta féfletta sig við það :P En hvernig fer hún að því ???? dammdammadamm :) Kemur í ljós :)))

XOXOXOXO Steinunn


Innskráning

Ath. Vinsamlegast kveikið á Javascript til að hefja innskráningu.

Hafðu samband